Еуро-2024: Қазақстан құрамасы есе жіберген Словения тағы жеңіске жетті

АСТАНА. ҚазАқпарат - Футболдан 2024 жылғы Еуропа чемпионатының іріктеу сатысында Қазақстан құрамасы сынға түсетін H тобындағы тағы бір ойынның нәтижесі белгілі болды, деп хабарлайды ҚазАқпарат тілшісі.

Екінші турда Словения өз алаңында Сан-Мариноны 2:0 есебімен тізе бүктірді. Олап алғашқы турда елордада Қазақстан құрамасынан 2:1 есебімен басым түскен болатын.

Кездесу барысында словениялық құрамадан Беньямин Шешко 57-минутта мергендік танытты. Ал 60-минутта Сан-Марино құрамасынан Роберто Ди Майо өзінің қақпасына гол соғып алды.

Еске салсақ, аталған топта 26 наурызда Қазақстан құрамасы өз алаңында Данияны 3:2 есебімен тізе бүктірді.

Әзірге екі турдан кейін алты ұпай жинаған Словения көш басында тұр. Одан кейінгі орындардағы Солтүстік Ирландия, Дания, Қазақстан құрамаларының еншісінде үш ұпайдан бар. Ал Финляндия мен Сан-Марино әзірге ұпай еншілеген жоқ.

Сондай-ақ бүгін аталған топта Солтүстік Ирландия - Финляндия құрамалары кездеседі.

Екінші турдың алғашқы ойын күнінде бірқатар кездесудің нәтижесі белгілі болды.

C тобында Англия өз алаңында Украинадан 2:0 есебімен басым түсті. Бұл топта енді Мальта - Италия құрамалары шеберлік байқасады.

J тобында Лихтенштейн Исландияға 0:7 есебімен жол берді. Аталған топта бүгін Люксембург - Португалия, Словакия - Босния және Герцоговина құрамалары жасыл алаңға шығады.