Ескерту: БҚО-да аптап ыстық болады

ОРАЛ. ҚазАқпарат - Батыс Қазақстан облысында алдағы үш күнде күннің қатты ыситыны жөнінде ескерту жарияланды, деп хабарлайды ҚазАқпарат тілшісі.

«Қазгидромет» РМК БҚО филиалының мәліметіне қарағанда, 25, 26 және 27 маусым күндері өңірде күннің ыстығы 32-37, тіпті кей жерлерде 40 градусқа дейін жетеді.

Орал қаласында да күндіз 33-35 градус ыстық болмақ.

Дәл қазір шаһарда температура тілі 31 градус ыстықты көрсетіп тұр.

БҚО ТЖ департаменті осыған байланысты тұрғындар арасында төтенше жағдайларды болдырмау, өмірлік маңызы зор нысандардың үздіксіз жұмысын қамтамасыз ету мақсатында тиісті шаралар қолға алынып жатқанын жеткізді.

Еске сала кетейік, бұдан бұрын күннің ысуына байланысты облыста өрт қаупі жарияланғанын жазған болатынбыз.