Есқайрат Хайдаров: Президенттік сайлау - ел мүддесіне сай келетін маңызды саяси шешім
Оның айтуынша, Қазақстан маңызды әрі жауапты саяси кезеңге өтіп отыр. Кез келген мемлекеттің саяси жүйесінің эволюциясы - заңды құбылыс.
«Еліміздің әлеуметтік-экономикалық даму қарқынын сақтау үшін билік ауысымы үдерісін барынша тезірек аяқтау қажет. Сол кезде ғана ұзақ мерзімді міндеттер мен күн тәртібіндегі әлеуметтік маңызды бағдарламаларды, жобаларды жүзеге асыру жоспарында айқындылық орын алады. Түрлі болжамдар сейіледі. Билік ауысуының транзиттік кезеңі тұрақтылық пен қоғамдық келісім кезеңіне жалғасады деп үміттенеміз», - деді Есқайрат Хайдаров.
Есқайрат Хайдаровтың пікірінше, Президент Қасым-Жомарт Тоқаевтың кезектен тыс президенттік сайлау өткізу туралы шешімі - бүгінгі таңда маңызды әрі қажетті шара. Президенттің бұл саяси бастамасы еліміздегі тұрақтылықты сақтап қалу үшін және мемлекетіміздің таңдап алған бағыт-бағдарын, даму жолын одан әрі қарай жалғастыру үшін жасалған нақты қадам.
Тәуелсіздіктің арқасында 30 жылға таяу уақыт ішінде Қазақстан экономикасы қарыштап дамыған, әлеуметтік әлеуеті артқан, демократиялық құндылықтарды қадірлейтін мемлекет ретінде өзін бүкіл әлемге әйгілі етті. Бұл жетістіктерге Елбасы Нұрсұлтан Назарбаевтың салиқалы саясаты мен қазақ халқының даналығы, қазақстандықтардың төзімділігінің арқасында қол жеткіздік. Қазақ елінің болашақта да халықтар арасындағы ынтымақтастықты ту етіп, алға қойған стратегиялық бағыт-бағдарларды басшылыққа ала отырып, қоғамдық-саяси, әлеуметтік-экономикалық және рухани жағынан дами берері ақиқат.
Еліміздегі биліктің ауысуына байланысты болған саяси өзгерістер кездейсоқ немесе мәжбүрлі түрдегі жағдай емес. Бұл ел басшылығының ауызбірлігінің және осы уақытқа дейінгі мемлекетті басқару дәстүріндегі мол тәжірибесінің арқасында болып отырған оң өзгерістер деп бағалаймыз. Осы уақытқа дейін Қазақстан Республикасы өзiн демократиялық, зайырлы, құқықтық және әлеуметтiк мемлекет ретiнде орнықтырып, саяси қалыптасқан мемлекетке айналды.
«Кезектен тыс сайлау өткізу Қазақстанның дамуына, өсуіне және қазіргі уақыттағы республикамыздың жаңа саяси жағдайға бейімделуіне арналған.
Біз халықаралық қоғамдастықтың, шетелдегі әріптестеріміздің, оның ішінде шетелдік инвесторлардың Қазақстанда жүріп жатқан билік транзитін мұқият қадағалайтынын ұмытпауымыз керек. Олар үшін айқындық, ішкі тұрақтылық, саяси және экономикалық бағыттың сабақтастығы маңызды болып табылады. Халық сайлаған Президент ел дамуының бағытын анықтап қана қоймай, елімізді халықаралық аренада таныстырады», - дейді ол.
Тарихшының пайымдауынша, сайлау биліктің заңдылығын нығайтуға, елдегі тұрақтылықты қамтамасыз етуге ықпал етеді. Оның қолданыстағы заңнама нормаларына қатаң сәйкестікте өткізілуі аса маңызды. Мұның барлығы Елбасы ұсынған стратегиялық бағдарламаларды тиімді іске асыруды жалғастыруға мүмкіндік береді.
«Сайланған Президент мемлекет басшысының функцияларын жүзеге асыруға, азаматтардың құқықтары мен бостандықтарының кепілі болуға халықтың сенім мандатын алады. Сайлау еліміздің алдында тұрған барлық міндеттерді табысты шешу үшін халықты шоғырландыру процесіне серпін береді. Сайлау - үлкен жауапкершілікті талап ететін саяси науқан. Президент өзінің сөзінде: «Сайлаудың таза, ашық әрі әділ өтуіне кепілдік беремін! Бұл - менің берік ұстанымым!», - деп қадап айтты. Бұл ел тағдыры үшін алдағы уақытта өтетін сайлаудың рөлінің зор екендігін білдіреді. Ал үміткерлер бізде барлық тіркелген саяси партиялардан және республикалық қоғамдық бірлестіктерден ұсынылатыны белгілі. Сондықтан халқымыз сайлауға белсене қатысып, өздерінің қалаған адамына дауыс береді деп есептейміз. Әрбір азамат еліміздің болашағы үшін өз таңдауларын жасауы тиіс», - деп түйіндеді ойын Есқайрат Хайдаров.
Еске сала кетейік, бұдан бұрын батысқазақстандық тарихшы-ғалымның ұлы даланың тарихы - ұлы халықтың тарихы туралы ой-толғамын жариялаған болатынбыз.