Есенсай ауылында газ алауы жағылды - БҚО
Тұрғындарды осынау мерейлі оқиғамен құттықтаған аудан әкімі Нариман Төреғалиев, «Лайгэ» ЖШС директоры Нұртай Жұмашев, «Нұржан» ЖШС директоры Әлжан Досмақов Елбасы тапсырмасына сәйкес ауыл халқының әл-ауқатын көтеру, тұрмысын жақсарта түсу бағытындағы жұмыстардың жалғасатынын атап өтті.
Жайықтың оң жағалауындағы Ростоша-Тайпақ магистралының түйіскен жерінен бастау алатын, сөйтіп, сол жағалаудағы Есенсай, Кеңсуат, Тасоба, Жұбан, Әтібек және Сайқұдық ауылдарына газ жеткізуге мүмкіндік беретін, яғни Сайқұдыққа дейін баратын аталған құбырдың жалпы ұзындығы - 92 шақырым. Оның жобалық құны - 1 млрд. 107 млн. теңге. Ал оны өзеннің сол жағалауына Қабыл ауылы тұсынан дәл есеппен өткізуде мердігер - «Лайгэ» ЖШС-нің қызметкерлері Жайықтың түбінен тігінен ұңғылау әдісін қолданды. Көгілдір отынды Есенсайда тұрғын үйлерге жеткізумен «Нұржан» ЖШС-нің құрылысшылары айналысуда.