Ертіс өзенінің алқабына ерекше қорғалатын табиғи аумақ мәртебесі берілуі мүмкін
Тиісті жобаны қазір Экология, геология және табиғи ресурстар министрлігі дайындап жатыр, деп хабарлады Павлодар қаласының жұртшылығымен кездесуде ҚР Экология, геология және табиғи ресурстар министрі Мағзұм Мырзағалиев.
«Ертіс өзенінің алқабына мәртебе беру үшін бұрын аяқталмаған техникалық-экономмкалық негіздеме пысықталып жатыр», - деді ол.
Министрдің сөзінше, бүгінгі таңда Қазақстан аумағының шамамен 9% ерекше қорғалатын табиғи аумақ мәртебесіне ие. БҰҰ мен басқа да халықаралық ұйымдардың ұсынысы бойынша бұл көрсеткішті 10 жыл ішінде 12%-ке дейін арттыру керек. Ал Ертіс өзенінің алқабы осындай аумақ тізіміне енуі мүмкін.
Кездесуде өңірдің экология саласындағы өзекті мәселелері эко-белсенділермен де талқыланды.
Министрдің айтуынша, қазірде Павлодар облысы бойынша Жол картасының жобасы жасалып жатыр. Онда өңірдегі экологиялық жағдайды жақсарту үшін шаралар белгіленеді. Бұл ретте министрлік қала жұртшылығымен бірге жұмыс істеуге ниетті.
Кездесуде сонымен қатар, кәсіпорындарда ең озық қолжетімді технологияларды (ОҚТ) енгізу, жасыл желек көлемін кеңейту, халықтың экологиялық мәдениетін жақсарту және экологиялық заңнаманы бұзғаны үшін айыппұлды қатайту мәселесі қозғалды.
Мәселен, халықтың Павлодар қаласында улы өндірістерді салуға тыйым салу туралы өтінішіне жауап ретінде министр нақты елдімекендегі немесе өңірдің ластану деңгейіне қатысты халықаралық тәжірибені Қазақстанда енгізу жоспарланып отырғанын жеткізді. Бұл ретте жаңа Экологиялық кодекске тиісті нормалар енгізілген.
«Қалай болғанда да, кез-келген қауіпті өндірісті салу кезінде қоғамдық тыңдаулар өткізілуі мүмкін. Сондай-ақ, жаңа Экокодекс жобасында халықтың қандай да бір жобалардың қабылдануына әсер етуін күшейтуге арналған тармақтар бар. Жасыл желектер туралы сұрақтарыңызға келсек, ол Жол картасына енгізіледі. Қоршаған ортаны ластайтын кәсіпорындардың табиғатты қорғау іс-шаралар жоспарына ағаш егуді енгізуді жоспарлап отырмыз. Біз мұны ERG компаниясымен де талқылайтын боламыз. Сонымен қатар, үш жыл ішінде ағаш кескені үшін нормативтік-құқықтық базаны қатайту, өтемақы ретінде ағаш отырғызу мен оларға күтім жасауды талап ету жоспарлануда», - деп атап өтті министр.
Сондай-ақ ол қоқыс лақтыру, ағаштарды кесу, белгіленбеген орынға көлік қою сияқты қоғамда болып жататын түрлі келеңсіздіктер туралы айта келе, мұндай заңбұзушылықтар үшін жаза күшейтілетінін жеткізді.
Ал келесі аптада Қазақстан мектептерінде экологиялық мәдениет пәнін енгізу үшін Білім министрлігімен бірлесіп онлайн дөңгелек үстел өткізу жоспарланып отыр.
«ҚР Президентінің экология пәнін еліміздің орта және жоғары оқу орындарында міндетті пән ретінде енгізу туралы бастамасын көпшілік қолдап отыр. Жаңа технологияларға келетін болсақ, біз жаңа Экологиялық кодекстің жобасына ең озық қолжетімді технологиялар (ОҚТ) нормасын енгіздік. Оған 1300-ге жуық бірінші санаттағы кәсіпорындар көшуі тиіс. Яғни шығарындылар көлемін едәуір төмендететін технологияларды енгізу керек. Егер қоршаған ортаны ластайтын кем дегенде 50 кәсіпорынды осыған көшірсек, мәселенің 80% шешіледі. Біз осы ретте кәсіпорындарды тексеруді бастадық. Еуропада ОҚТ енгізу үшін 15 жыл қажет болған. Қазақстанда барлық жұмыс істейтін кәсіпорындар 2035 жылға қарай ОҚТ жүйесіне көшуі тиіс. 2025 жылдан бастап салынған барлық кәсіпорында жұмыс істеп тұрған ОҚТ болуы керек. Кәсіпорындар бұл ретте үнемделген ақшаны ОҚТ енгізуге салуға ынталануы үшін мемлекет эмиссия төлетуден бас тартуға дайын», - деді М.Мырзағалиев.
Министр осы аталған шаралардың барлығы жаңа Экологиялық кодекс жобасында қарастырылғандығын айта келе: «Бұл мәселелердің көпшілік арасында талқылануын тек қана қолдаймыз. Алайда онда экология мен экономиканың арасындағы баланс сақталуы қажет. Қаланың эко-белсенділеріне өңірдің экологиялық проблемаларына назар аударудағы үлкен жұмысы үшін алғыс айтқым келеді», - деді Мағзұм Мырзағалиев.