Ерлан Қошанов: Журналист мамандығы бойынша түскен ауыл түлектеріне грант бөлінеді

ҚАРАҒАНДЫ. ҚазАқпарат - Қарағанды облысында жыл сайын ҚарМУ-ға "журналистика" мамандығы бойынша түсетін ауыл мектептерінің түлектеріне гранттар бөлінеді. Бұл туралы аймақ басшысы Ерлан Қошанов "Өңірлік БАҚ. Даму векторлары" атты форумда мәлімдеді, деп xабарлайды ҚазАқпарат тілшісі.

Облыс әкімі сондай-ақ облыс орталығында медиа-клуб құру жоспарлары туралы айтты. Журналистер үшін бұл арнайы алаң коворкинг-орталықты және баспасөз мәслихаттарына арналған жабдықталған залды біріктіретін болады. Мұнда сондай-ақ журналистер мен баспасөз хатшылары үшін мастер-кластар, тренингтер мен семинарлар өтеді.

Айта кетсек, бұл БАҚ өкілдері үшін ұйымдастырылған Форум өңірлік журналистикаға арналды.

"Әлі де газеттерді оқып, жергілікті жаңалықтарды көруге дайын адамдар бар, өңірлік БАҚ біздің қалаларымызда, аудандар мен кенттерде жалғасатын болады. Жұмысын тоқтатпауы үшін олар дамуы керек. Біз өз тарапымыздан оған көмектесуге дайынбыз. Сонымен қатар, бірінші кезекте мемлекеттік органдар бұған мүдделі", - деді Ерлан Қошанов.

Форумға шақырылған спикерлер өңірлік журналистердің қалай дамуы мен өзгеретіні туралы айтты. Олардың қатарында белгілі журналистер мен медиа - менеджерлер - "AIQYN" республикалық қоғамдық - саяси газетінің бас редакторы Нұртөре Жүсіп, "KAZAKH TV" ТК директоры Майя Бекбаева, "Informburo.kz" ақпараттық порталының бас редакторы Михаил Дорофеев, "Ulys" цифрлық журналының бас редакторы Ержан Қалымбайұлы, "Ortalyq Qazaqstan" облыстық газетінің директоры Қамбар Ахметов, Бұқар Жырау ауданы "Бұқар жырау жаршысы" газетінің бас редакторы Әлия Жұмақаева болды.

"Өңірлік БАҚ - бұл біздің қоғамның жүйке жүйесі деуге болады. Егер олар инертті немесе жабылатын болса, онда біз xалықпен байланысты жоғалтамыз. Аймақтық журналистика әрқашан халыққа жақын болуы керек. Әкімнің аузынан билік диалогқа ашық екенін естуге қуаныштымыз. Тек өртті сөндірмей, оны болдырмауға болады", - деп атап өтті Майя Бекбаева.

Спикерлер сондай-ақ қазіргі журналистика мәселелері мен сын-қатерлері туралы айтты. Олардың бірі мессенджерлер мен әлеуметтік желілердің өсіп келе жатқан әсері болып табылады. Және соның салдарынан дәйексіз немесе тексерілмеген ақпаратты тарату. Бұл туралы Іnformburo.kz ақпараттық порталдың бас редакторы Михаил Дорофеев айтып өтті. Спикер сондай-ақ журналистердің басты міндеті объективтілік, қысымға төтеп беру және шын мәнінде маңызды нәрсе туралы айту қабілеті болғанын және болып қала беретінін еске салды.

Сонымен қатар, форумда қазақ журналистикасының дамуы туралы сөз қозғалды.

"Шынында да, Қарағанды қазақ журналистикасындағы кадрлардың ұстаханасы болды. Облыс басшысы атап өткендей, оған қарағандылық журналистердің тек елімізде ғана емес, шетелде де жемісті еңбек етіп жатқандығы дәлел. Қазақ журналистикасының рөлі еліміздің қалыптасуында, Тәуелсіздікті нығайтуда өте маңызды деп мақтанышпен айтуға болады. Қазақ журналистикасы стратегиялық институттың рөлін атқарады. Мен де Қарағанды журналистикасының мектебінен өттім. Бүгін журналистиканың аға буынын, құрдастарым мен әріптестерімді көргеніме өте қуаныштымын", - деді Ержан Қалымбайұлы.

Форум соңында БАҚ өкілдері өз тілектерін білдіріп, әріптестерін кәсіби мерекелерімен құттықтады.