Ерлан Қошанов көпбалалы отбасыларға қандай көмек көрсетілетінін айтты
«Мемлекет халықтың әлеуметтік осал топтарына әрқашан қолдау көрсетеді. Облыс бюджетінің 50%-дан астамы әлеуметтік салаға бағытталады. Сонымен қатар, Елбасының тапсырмасын орындау аясында облыстық бюджеттің барлық мүмкіндіктерін зерделеп, біз мемлекеттік қолдау шараларының ауқымын кеңейту жөнінде шешім қабылдадық», - деді облыс әкімі.
Ол көпбалалы және аз қамтылған отбасылардың жағдайын жақсартуға бағытталған 10 қадам туралы тоқталып өтті.
Көпбалалы аналарға қосымша мынадай жеңілдіктер қарастырылады: 1 маусымнан бастап қалалық көлікте тегін жүру; бастауыш сынып балалары үшін тегін ыстық тамақ; балабақшаға 50% жеңілдік беріледі.
Сонымен қатар, мектептерде ұзартылған күннің тегін топтары қарастырылған. Көпбалалы отбасынан шыққан балаларға музыка және көркемөнер мектептерінде, спорт секцияларында тегін шұғылдуға мүмкіндік беріледі. Сондай-ақ жазда балалар мектеп жанындағы лагерлерге орналастырылады.
Колледждерде білім алуға бюджеттен 5,5 млрд теңге бөлінеді. Бұл 8 мыңнан астам грант беруге мүмкіндік береді.
Әкімнің айтуынша, көпбалалы аналарға өз ісін ашуға 200 грант беру жоспарлануда. Олар үшін арнайы бизнес-инкубатор құрылмақ.
Сонымен қатар, облыста отбасын қолдау орталығы ашылады, онда мамандар мен психологтар кеңес береді.