Ербол Қарашөкеев түркістандық шаруалардың мәселелерін тыңдады
ҚР Ауыл шаруашылық министрі Ербол Қарашөкеев Түркістан облысына жұмыс сапары барысында Ордабасы ауданында орналасқан «Аделя» шаруа қожалығының жұмысымен танысты.
Сондай-ақ аталған агрокешенде жылыжайлардың коммуналдық шығындарын субсидиялау мәселесін талқылау мақсатында жылыжай шаруашылығының жауаптыларымен кездесті.
Жиынның күн тәртібінде жылыжай шаруашылығын дамытудағы түрлі кедергілер талқыланып, жергілікті кәсіпкерлер өздерін толғандырған сұрақтарын ортаға салды.
Мәселен, Түркістан облысында 1467,4 гектарды құрайтын 3366 жылыжайдың республикадағы үлесі 71 пайызды құрағанмен алынатын өнімнің өзіндік құны кеткен шығынды өтемей отыр.
Бұл туралы жылыжай шаруашылығы қауымдастығының төрағасы Мырзахмет Сынабаев айтты.
Сондай-ақ, ол шаруалардың арқасына батқан осы бір ауыртпалықтан құтылудың жолы мемлекеттік қолдау екендігін жеткізді.
Оның айтуынша жылыжайды жылытуға қажетті қуат көздері тарифінің қымбат болуы, арзандатылған отандық тыңайытқыштардың шаруашылыққа аз бөлінуі, көрші елдерден келетін көкөніс өнімдерінің ел нарығына кедергісіз еніп, дайын өнімнің құнын төмендетуі сынды мәселелер жерден жеміс жеген, жыл он екі ай еңбек ететін шаруалардың әлеуетін арттыруға кедергі болуда.
Кездесуде шаруалар өзге де талап-тілектерін кеңес талқысына салды.
Шаруалардың уәжі бойынша отандық өнім өндірушілерді қолдау үшін жылыжайларға қолданатын қуат көздерін 50 пайызға дейін субсидиялау, шетелден, көрші елдерден ішкі нарыққа кіретін көкөніс, бақша өнімдеріне салынатын салықтың көлемін ұлғайту қажет.
Сондай-ақ, жылыжай кешеніне берілген несиені төлеу мерзімін ұзарту, коммуналдық төлемдер көлемін күндізгі және түнгі мерзімге бөліп төлеу тетіктерін реттегенде ғана шаруаның табысы артып, өндіріс көлемі ұлғаяиынын жеткізді.
Кәсіпкерлердің сөзіне сүйенсек, үй құстарының азығының өзіне кеткен шығын базарға бағытталған өнімнің құнын ақтауға жетпейді екен.
Салдарынан құс еті мен жұмыртқа өндірісінде көшбасшы кәсіпорындардың өзі өндіріс орындарының жұмысын жалғастыруға алаңдаулы екендігін жасырмады.
Шаруа қожалық басшылары мен кәсіпкерлердің талап-тілектерін мұқият тыңдаған сала министрі мәселені арнайы жұмысшы топ құрып, шешу жолдарын қарастыратындығын жеткізді.
«Бұл мәселе бір ғана министрлікпен шектеліп қалмайды. Біз екі апта ішінде түрлі министрліктер, қаржылық ұйымдар мен жеңілдетілген несие беру мекемелері, кедендік бақылау органдарымен, жергілікті әкімдік және кәсіпорын өкілдерінен құралған арнайы жұмысшы топ арқылы талқылап, реттейтін боламыз», — деді Ербол Қарашөкеев.