Ералы Тоғжанов Өзбекстанның денсаулық сақтау министрімен кездесті
2021 жылғы 21 желтоқсан 21:54

Ералы Тоғжанов Өзбекстанның денсаулық сақтау министрімен кездесті

НҰР-СҰЛТАН. ҚазАқпарат - Бүгін ҚР Премьер-Министрінің орынбасары Ералы Тоғжанов Өзбекстан Республикасының денсаулық сақтау министрі Бехзод Мусаевпен кездесті. Бұл туралы ҚазАқпарат primeminister.kz сайтына сілтеме жасап хабарлайды.

Е. Тоғжанов еліміздің денсаулық сақтау саласындағы даму нәтижелері мен жетістіктерін баяндай келе, Қазақстан осы саладағы ынтымақтастыққа және Өзбекстанның денсаулық сақтау жүйесін дамытуға көмек пен қолдау көрсетуге дайын екенін хабарлады.

Біздің медицина саласындағы жоғары білікті мамандарымыз халықтың денсаулығын қамтамасыз етуге қатысты барлық аспектілер бойынша тәжірибе мен біліммен бөлісе алады. Е. Тоғжанов делегация мүшелерін QazVac коронавирус инфекциясына қарсы отандық препараттың өндірісімен және тиімділігімен таныстыра отырып, бүгінгі күні вакциналар паспорттарын өзара тану жөніндегі жұмысты жандандыру қажеттігі туралы маңызды мәселені көтерді.

Бұл Қазақстан мен Өзбекстан азаматтарының кедергісіз жүріп-тұруын қамтамасыз етіп, елдер арасындағы іскерлік байланыстарды жандандыруға мүмкіндік береді.

Өз кезегінде Бехзод Мусаев ынтымақтастық үшін ризашылығын білдіріп, Өзбекстанның мемлекеттік-жеке меншік әріптестік аясында медицина саласында жүзеге асырылған еліміздің жобаларына үлкен қызығушылығы бар екенін хабарлады. Е. Тоғжанов қазақстандық мамандар медицинадағы АT, жедел жәрдем жұмысын ұйымдастыру, алғашқы медициналық-санитариялық көмек және медицина ғылымын ілгерілету мәселелерінде консультативтік және техникалық көмек көрсетуге дайын екенін жеткізді.

Кездесу соңында Ералы Тоғжанов барлық қатысушыларға денсаулық, табысты бастамалар мен жемісті жұмыс тіледі.


Jańalyqtar

MURAǴAT