Ералы Тоғжанов: 1 миллионнан астам жұмысшының жалақысы 5-тен 50% өсті

НҰР-СҰЛТАН. ҚазАқпарат – Жыл басынан бері еңбек даулары бар 140 проблемалық кәсіпорын анықталып, оның 91-інде мәселе шешілген. Бұл туралы ҚР Премьер-Министрінің орынбасары Ералы Тоғжанов Мәжілістің жалпы отырысында айтты, деп хабарлайды ҚазАқпарат тілшісі.

«Жыл басынан бері еңбек даулары бар 140 проблемалық кәсіпорын анықталып, 91-інде мәселе шешілді. 49 кәсіпорында жұмыс жүргізілуде. 800-ден аса заң бұзушылық жойылып, 10 мыңға жуық қызметкердің құқығы қорғалды.

Екіншіден, 200 кәсіпорында 2,7 мыңнан аса жұмыскер жалақысы бойынша берешекті өтеу қамтамасыз етілді.

Үшіншіден, 1 миллионнан астам жұмысшының жалақысы 5-тен 50%-ға дейін көтерілді»,- деді Ералы Тоғжанов.

Сондай-ақ, ол қызмет көрсетуші компаниялар қызметкерлерінің жалақысы негізгі компания қызметкерлерінің орташа жалақысының 70%-на теңестірілгенін еске салды.

«Бесіншіден, бүгінде депутаттық корпуспен бірге кәсіподақ қозғалысын жаңғырту бағытында ауқымды жұмыстар атқарылуда.

Соңғы кездегі еңбек жанжалдары еңбек қатынастарын реттеуде жұмыс берушілер өкілдерінің қатысуы жеткіліксіз екенін және олардың ұжым ісінен оқшаулану проблемалары бар екенін көрсетті», - деді Үкімет басшысының орынбасары.

Сондай-ақ, Ералы Тоғажнов Мәжілісдепутаттарына инфлияцияны тежеу бағытындағы шаралар туралы мәлімет берді.

Оның мәліметі бойынша, биыл зейнетақы мен жәрдемақыны индекстеуге қосымша 111 млрд теңге бөлінеді.