Эммануэль Макрон Астанаға сапарлайды
«Қазақстан мен Франция арасында өте жақсы өзара қарым-қатынас қалыптасқан. Франция біздің үлкен стратегиялық серіктесіміз әрі сенімді досымыз. Өзіңізде білетіндей, Франция біздің ең ірі экономикалық серіктестестеріміздің ондығына кіреді. Дипломатиялық қарым-қатынас орнаған 26 жылдың ішінде өзара іс-қимылдың тамаша сәулеті қалыптасқан. Бұған қоса, ағымдағы жыл Франция мен Қазақстан арасында стратегиялық серіктестік туралы шартқа қол қойылуының 10 жылдығымен де ерекшеленеді», - деді кездесу барысында Гүлшара Әбдіқалықова. 
Мемлекеттік хатшы екі елдің Мемлекет басшылары арасында да тығыз байланыс орнағандығын еске салып өтті.
«Таяуда Қазақстан Президенті Нұрсұлтан Назарбаев Франция Президенті Эммануэль Макронмен Бельгияда өткен үлкен саммит алаңында кездесті. Нақты мәселелер талқыланды. Франция Президенті келесі жылы Астанаға келуге ниет танытып отырғанын білеміз. Меніңше, аталған сапар біздің ынтымақтастығымызға қосымша серпін береді», - деді ол. 
Гүлшара Әбдіқалықова екі елдің білім саласындағы ықпалдастығы да кеңейіп келе жатқанын айтты.
ҚР Президентінің бастамасымен 2014 жылы Абай атындағы қазақ ұлттық педагогикалық университеті жанынан «Сорбонна-Қазақстан» институты ашылғанын еске салды. Осы ретте тараптар білім саласында басталған бастамаларды одан ары жалғастыруға уағдаласты.
Кездесу соңында ҚР Мемлекеттік хатшысы француз Елшісіне Қазақстан-Франция ынтымақтастығын одан ары нығайту ісіне мол табыс тіледі.