Елордалық волонтер-заңгерлер азаматтарға тегін құқықтық көмек көрсетті

НҰР-СҰЛТАН. ҚазАқпарат - Бүгін «Біз - біргеміз» жобасы аясында елордалық волонтерлер «Шапағат» және «Әсем» сауда орталықтарында тұрғындарға тегін құқықтық кеңестер берді, деп хабарлайды қала әкімдігінің ресми сайты.

Шара халықтың құқықтық сауаттылығын арттыруға және азаматтарға консультациялық көмек көрсетуге волонтер-заңгерлерді тартуға бағытталған.

«Іс-шара барысында адвокаттар, заңгерлер, сот орындаушылары, құқық қорғау органдарының басқа да қызметкерлері және «Құқықтану» мамандықтарының студенттері қала тұрғындарына кеңес беру жұмыстарын жүргізді. 300-ден астам адам маңызды мәселелер бойынша кеңес алды. Осындай іс-шараларды айына бір рет жүйелі негізде өткізу жоспарлануда», - деді Қоғамдық даму істері басқармасының маманы Ақұлан Тастемір.

Іс-шара қалалық Әділет департаменті мен Нұр-Сұлтан қаласының Қоғамдық даму істері басқармасымен бірлесіп ұйымдастырылды.