Елордаға кемінде 20 мектеп салуымыз керек - Білім министрі
"Апатты, үш ауысымды мектептерге қатысты айтар болсақ, бұл ретте мұндай проблеманың сақталып отырғандығын атап өтпей кете алмаймыз. Бір ғана цифр айтуға болады - 130-дан астам мектеп, бұлар 1950 жылға дейін салынған білім ордалары. Сонымен қатар 1980 жылдары салынған 2 900 мектеп те бар. Яғни, жыл сайын тозу орын алып, жаңа мектептер салу мәселесі туындай береді", - деді министр.
Асхат Аймағамбетов еліміздегі демографиялық процестер мектептердің тапшылық мәселесіне де ықпал ететіндігін баса айтты.
"Бұған қоса, демографиялық процестер тарапынан қысымды көріп отырмыз. Тек Нұр-Сұлтан қаласының өзіне жыл сайын 20 мың бала көшіп келеді. Бұл кемінде 20 мектеп салу қажет деген сөз. Біз бұл проблемалардың барлығын білеміз және осы бағытта жұмыс жүргіземіз", - деді ол.