Елордадағы «Сергектер» 57 мыңға жуық жол ережесін бұзу дерегін тіркеді
Нұр-Сұлтан қаласы полиция департаментінің апаттық талдауына сәйкес, 2022 жылдың басынан бері 162 ЖКО орын алған, онда 3 адам қаза тауып, 175 адам жарақат алды. Жүргізушілер жасаған бұзушылықтардың жалпы саны 31 мыңнан асады.
«Бүгінгі таңда елорда аумағында 6 мыңнан астам камера орнатылып, 56 мың 724 жол қозғалысы ережесін бұзу фактісі тіркелді. Олардың дені жылдамдық режимін арттырған мен белгіленбеген жерде тоқтап тұрған. Сонымен қатар, Цифрландыру басқармасы 26 учаскеде орнатылған реттелетін жаяу жүргіншілер өткелінің тыйым салу сигналына өтуін «Сергек» камераларымен тіркеу функциясын әзірледі. Сондай-ақ, «Астана тұрақ кеңістігі» компаниясымен бірлесіп, тұрақ ережелерін бұзу фактілерін, оның ішінде екінші қатарда және қоғамдық көлік аялдамаларында тіркеу бойынша пилоттық жоба іске асуда», - деп жазылған хабарламада.
Онда жүргізушілер назарын аудару және автокөліктердің жылдамдығын мәжбүрлеп төмендету үшін 23 учаскеде көтеріңкі жаяу жүргіншілер өткелі жабдықталғаны туралы мәлімет бар. Сонымен қатар, өткен жылдан бері реттелмейтін жаяу жүргіншілер өткелдерінің алдына 267 жасанды жол бұдырлары салынды. Аталған учаскелерде жол-көлік оқиғаларының саны екі есеге төмендегені байқалды.