Елордада жол ақысын төлеудің жаңа жүйесі енгізіледі
2022 жылғы 23 сәуір 12:30

Елордада жол ақысын төлеудің жаңа жүйесі енгізіледі

НҰР-СҰЛТАН. ҚазАқпарат – Елордадағы «City Transportation Systems» ЖШС-да қалалық мәслихат депутаттарына қоғамдық көлікте жол ақысын электронды төлеудің жаңа жүйесі таныстырылды, деп хабарлайды ҚазАқпарат тілшісі.

«Депутаттық корпус ретінде, бұл саланың ашық болуына мән беріп отырмыз. Сондықтан шешім қабылдау кезінде жүйенің сапасы мен тиімділігіне ерекше екпін қойылған. Жаңа жүйенің негізгі өлшемшарты ретінде оған жылдам әрі бірқалыпты өту, жол ақысын тиімді бақылау және жеңілдігі бар санаттағы азаматтарға қолайлы жағдай жасау ескерілген», - деді Нұр-Сұлтан қаласы мәслихатының депутаты Владислав Сергеев.

Атап айтқанда, қазіргі кезде қызмет көрсетушілер арасында бірнеше компания бар – «Innoforce solutions» (Avtobys) ЖШС, «SMSBUS» ЖШС, «БПЦ Қазақстан» және «Технодата» ЖШС консорциумы. Сонымен қатар, депутаттарға өз жүйесін қарастыру үшін «Алматы қаласының көлік холдингі» ЖШС «Оңай» жүйесін ұсынды.

Әр компания өздері ұсынып отырған жол ақысын төлеу жүйесінің артықшылығымен таныстырды. Осы орайда VISA және Mastercard банк карталарымен, NFC жүйесімен жабдықталған смартфон арқылы, Bluetooth және басқа да төлем жүйесі қамтылған. Жолақы төлеудің жаңа жүйесі көлік карталарын толтырудың онлайн режиміне көшуді де қамтиды.

Белгілі болғандай, бүгінгі таңда астанада қоғамдық көліктегі жолаушылар ағыны орташа 650 мың сапарды құрап отыр. Жолаушылар жол ақысын екі жолмен төлей алады – бұл көлік картасымен және QR-кодты сканерлеу арқылы. Ол үшін әртүрлі қосымшалар бар (Transcard, Kaspi.kz, Homebank, ұялы байланыс операторларының қосымшалары және тағы басқа). Жол жүру құны 7 жыл бойы 90 теңге деңгейінде сақталған.

Бұдан бұрын хабарланғандай, өткен жылдың 18 қазанынан бастап елордада бірнеше қоғамдық көлік бағдарларында пилоттық режимде үш кәсіпорынның жол ақысын төлеудің жаңа жүйесі тестілеуден өтіп жатыр. Әрбір жүйе егжей-тегжейлі қарастырылып, олардың ең тиімдісі, сондай-ақ жолаушылар үшін қолайлысы анықталатын болады.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT