Елордада жасөспірімдер арасында күрес түрлерінен Азия чемпионаты басталды
Күрестің үш түрінен, атап айтар болсақ, грек-рим, еркін және әйелдер күресі бойынша өтетін Азия чемпионаты 7 шілде күні мәресіне жетеді.
Континентальдық чемпионат Бірыңғай күрес әлемі ережелеріне сәйкес өткізіледі.
14-16 жас аралығындағы жасөспірімдер арасында өтетін додаға Азия құрлығының 19 елінен 300-ден астам спортшы қатысады. Қазақстанның намысын 30 спортшы қорғамақ.
Бүгін аталған біріншілік аясында «Дәулет» СК мәжіліс залында Республикалық күрес федерациясының басшылығы баспасөз мәслихатын өткізді. Онда Азия чемпионаты және Токио-2020 Олимпиадасына жолдама беретін күрес түрлерінен әлем чемпионатына дайындық мәселелері сөз болды.
Жарыс күн сайын сағат 9:00-де басталады. Кіру тегін.
Еске салайық, 2019 жылғы 14-22 қыркүйекте Елорда төрінде күрес әлемінің ең басты спорттық іс-шарасы - грек-рим, еркін және әйелдер арасындағы күрес түрлерінен, сондай-ақ грэпплингтен әлем чемпионаты өтеді.