Елордада жаңа магистралды экспресс-бағдарлар ашылады
«Өткен жылы жаңа 4 бағдар ашумен қатар 11 қолданыстағы сызбаны оңтайландырдық, қоғамдық көлік қозғалысының аралығын 30 пайызға қысқарттық. Елорда «шеткері аймақсыз қала» принципі бойынша дамуын жалғастыруда. Жолаушыларға қолайлы болуы үшін қала орталығын шеткері аймақтармен жалғастыратын 20 тікелей бағдар жүріп тұр. Таяуда жаңа магистралды экспресс-бағдарлар іске қосамыз», - деді Астана әкімі.
Сонымен қатар ол таяуда қалаға газбен жүретін 80 жаңа автобустың сатып алынатындығын айтты.
«Сынның әлі де бар екендігін түсінемін. Бұл жерде біз жүйелі жұмыс істеп жатырмыз. Бүгінгі күні қалалық автобус паркі 70 пайызға жаңартылды. Таяу уақытта тағы да 80 газбен жүретін автобус сатып алуды жоспарлап отырмыз. Ілкі режимде электроавтбус қатынап жүр. Бұл бағдарларлардағы жүктемені айтарлықтай төмендетуге мүмкіндік береді», - деді қала басшысы.
Бақыт Сұлтанов бастапқы уақытта сынға ұшыраған жылы аялдамаларға да тоқталып өтті.
«Өткен жылы Астанада бюджет және мемлекеттік-жекешелік әріптестік есебінен мұндай 74 аялдама орнаттық. Олардың санын арттыру жоспарда бар», - деді ол.