Елордада балабақша тәрбиешілерінің жалақысы көтерілуі мүмкін

АСТАНА. ҚазАқпарат - Елордада балабақша тәрбиешілерінің жалақысын көтеру мәселесі қарастырылып жатыр. Бұл туралы бүгін елорда әкімдігінде өткен жиында ҚР Астана қалалық білім басқармасы басшысының орынбасары Гүлжан Айтжанова айтты, деп хабарлайды ҚазАқпарат тілшісі. 

«Жалақыға қатысты бұл мәселе Білім және ғылым министрлігінде талқыланып жатыр. Қазір мектепке дейінгі ұйымдардың да, қосымша білім беру ұйымдарының да еңбекақы қорына қатысты түзетулер жөніндегі барлық ұсыныстары жинақталуда. Шындығында да, балабақша тәрбиешілерінің жалақысы өте төмен және ол санатқа, штатқа байланысты. Біз өз ұсынысымызды енгіздік. Жалпы, жалақыға байланысты тиісті нормативтік актілерге өзгерістер енгізу туралы жинақ жасалады», - деді ол. 

Сонымен қатар, ол балабақшадағы орын жетіспеушілігіне де тоқталды. 

«Мектепке дейінгі ұйымдарда орын жетіспеуіне қатысты айтар болсам, өткен жылы мемлекеттік тапсырысты орналастыру есебінен 79 мектепке дейінгі ұйым ашылып, оларға 9 мың балаға мемлекеттік тапсырыс берілді. Қазіргі уақытта республика бойынша 18 мың мектепке дейінгі жеке ұйым және 300-ден астам қосымша мектепке дейінгі білім ұйымы бар», - деді Гүлжан Айтжанова.