Елордада ауылшаруашылық жәрмеңкелерінің маусымы ашылады

НҰР-СҰЛТАН. ҚазАқпарат - 31 тамыздан бастап елордада ауылшаруашылық жәрмеңкелерінің күзгі маусымы басталады. Әр демалыс күндері «Хан Шатыр» СОО жанындағы алаңда өңірлер өндірушілері әкелген өнімдерді сатып алуға болады, деп хабарлайды ҚазАқпарат қала әкімдігінің сайтына сілтеме жасап.

Жәрмеңкелердің қазіргі маусымы жаңа форматта – үлкен шатырдың астында өтетін болады. Әрбір өнім түріне жеке бөлімдер бөлінеді. Шатырлар жеміс-көкөніс өнімдеріне, ет пен сүтке тоңазытқыш қондырғысы мен мұздатқыш қондырғысы, сонымен қатар, өңірлерде өндірілетін халық тұтынатын тауарлар үшін орнатылады.

Келушілер қаладағы ірі супермаркеттердегідей азық-түлік арбаларын да қолдана алады.

Өнім бағасы өндірушілердің өзінен тікелей алғандықтан, әдеттегідей нарықтық бағадан төмен болады.

Кестеге сәйкес маусымның соңына дейін елордаға республиканың өңірлері түрлі ассортиментті өнім ұсынып, сол арқылы қаланы қажетті азық-түлік өнімдерімен қанықтырады және өз облысының мәдени дәстүрлерін көрсетеді.

Дәстүр бойынша жәрмеңкелер маусымын еліміздің оңтүстік өңірінің өкілі - Түркістан облысы ашады. Елордаға 250 тоннадан астам өнім әкелетін 60 тауар өндірушілер өз өнімдерін ұсынады. Сонымен қатар, ұйымдастырушы өңірдің өнерпаздар ұжымдары концерт қояды.

Ауылшаруашылық жәрмеңкелер маусымы 27 қазанда аяқталады.

Қосымша ақпаратты 556978, 556899 (WhatsApp: [phone]) арқылы алуға болады.