ФУТБОЛДАН ӘЛЕМ ЧЕМПИОНАТЫ-2022

Елордада Astana Open ATP 500 турнирінің жеребесі тартылды

2022 жылғы 1 қазан, 14:53
Елордада Astana Open ATP 500 турнирінің жеребесі тартылды

АСТАНА. ҚазАқпарат – Елордада Astana Open ATP 500 турнирінің жеребесі тартылды, деп хабарлайды ҚазАқпарат тілшісі.

Қазақстан теннис федерациясынан мәлім еткендей, еліміздің бірінші, әлемнің 41-ракеткасы Александр Бублик алғашқы айналымда дүниежүзілік рейтингте 52-орында тұрған нидерландылық Таллон Грикспурмен кездеседі.

Михаил Кукушкин әлемнің 6-ракеткасы, грекиялық Стефанос Циципаспен ойнайды.

Ақтау теннис мектебінің түлегі, 21 жастағы Бейбіт Жукаев әлемнің 35-ракеткасы, нидерландылық Ботик ван де Зандсхулппен кортқа шығады.

Әлемнің бірінші ракеткасы, US Open-2022 турнирінің чемпионы, испаниялық Карлос Алькарас рейтингте 31-сатыдағы даниялық Хольгер Рунемен сынға түседі.

Жарыстың екінші ракеткасы, ресейлік Даниил Медведев испаниялық Альберт Рамос Виноласқа қарсылас атанды.

Додаға сондай-ақ «Үлкен дулыға» турнирінің 21 дүркін чемпионы, сербиялық Новак Джокович (жарыстың 4-ракеткасы), ресейлік Андрей Рублев (5), италиялық Янник Синнер (6), поляк Хуберт Хуркач (7), канадалық Феликс Оже-Альяссим (8) және басқалар қатысады.

«Турнирге қатысушылардың құрамы өте мықты. «Мастерс» және «Үлкен дулыға» жарыстарынан кем түспейді. Сондықтан матчтар өте тартысты өтетін болады. Өз шеберлігімді көрсету үшін бар күшімді саламын», деді Даниил Медведев.

Еске сала кетейік, бұдан бұрын Бейбіт Жукаевтың екі мәрте ел чемпионы атанғанын, теннисші Тимофей Скатовтың Лиссабон турнирінің жартылай финалына шыққанын жазған болатынбыз.

Сондай-ақ Дмитрий Попко Аргентинадағы жарыстың жартылай финалына өтті.







Теги:
Ұқсас жаңалықтар
Серіктестер жаңалықтары

Jańalyqtar