Елордада әл-Фарабиге ескерткіш қойылады
2021 жылғы 4 қараша 14:04

Елордада әл-Фарабиге ескерткіш қойылады

НҰР-СҰЛТАН. ҚазАқпарат – Нұр-Сұлтан қаласында әлемнің екінші ұстазы атанған Әбу-Насыр әл-Фарабидің құрметіне ескерткіш қойылмақ, деп хабарлайды ҚазАқпарат тілшісі.

Көрнекті тұлғаға қойылатын ескерткішке қатысты әңгіме елорданың қалалық мәслихат жанындағы қоғамдық кеңес отырысында айтылды.

«2019 жылы Президент Әкімшілігінен елордада әл-Фараби, Құрманғазы, Ж. Тәшенов және тағы басқа тұлғаларға ескерткіш қою тапсырмасы берілді. Өткен жылы пандемияға байланысты әл-Фарабиге ескерткіш орнату кейінгі шегерілді. Қазір ескерткіш дайындалып жатыр. Жалпы биыл Ж. Тәшенов пен Т. Бигелдиновке ескерткіш қоюға қаржы бөлінді», - деді Нұр-Сұлтан қаласының Стратегиялық және бюджеттік жоспарлау басқармасының басшысы Қайсар Маңқараев.

Еске сала кетсек, өткен жылы елордадағы Оқушылар сарайында әл-Фараби орталығы ашылған еді.

Сондай-ақ, аталған Оқушылар сарайына әл-Фараби атауы берілді.


Автор:
Тілші

Jańalyqtar

MURAǴAT