Елорда тұрғыны ШҚО-да көлігімен адам қағып өлтіріп, қашып кеткен
Полиция қызметкерлері 11 маусым күні түнгі сағат 01.45-те Селевин көшесіндегі реттелмеген жаяу жүргіншілер жолағында екі адамды қаққан жүргізушіні анықтап, қолға түсірді.
Зардап шеккендердің бірі қаза болды, екіншісіне амбулаториялық ем тағайындалды.
«Оқиға орнынан із суытқан жүргізуші Нұр-Сұлтан қаласының тұрғыны болып шықты. Қазіргі уақытта 37 жастағы ер адам уақытша ұстау изоляторына қамалды», - дейді ШҚО Полиция департаменті бастығының орынбасары Елдос Закимов.
Аталған факті бойынша сотқа дейінгі тергеу амалдары басталып, бірқатар сараптама тағайындалған. Жүргізуші 5 жылға дейін бас бостандығынан айырылуы мүмкін.
Айта кетейік, 11 маусым күні Семейде тағы бір жол-көлік оқиғасы орын алған болатын. Екі адамды қағып, сол жерден тайып тұрған жүргізушіні полицейлер іздестіруде.