Елорда оқушыларына теңге тақырыбында ашық сабақ өтті
Ашық сабақта төл теңгенің шығу тарихы мен тәуелсіз еліміздің айрықша белгілерінің бірі ұлттық валютамыздың маңызы сөз болды.
«Ұлттық музейде жеткеншектерге арналған іс-шаралар көптеп ұйымдастырылады. Соның бірі бүгінгі теңге тақырыбына арналған ашық сабақ. Мұндағы мақсат - балаларға төл теңгенің шежіресімен қатар, ақша тек айырбастау құралы емес, ол ұлттық құндылықтардың бірі екендігін ұғындыру. Оқушылар арнайы ұйымдастырылған ақшалар көрмесінде теңгемен қоса әлем елдерінің ақшаларын көріп, олардың пайда болу тарихымен танысуда», - дейді ҚР Ұлттық музейінің ғылыми кітапхана жетекшісі Толқын Дариш.
Ашық сабақ барысында ұйымдастырылған көрмеде ортағасырлық Түрік, Түргеш қағанаттарының металл монеталары мен ұлттық музейдің жеке қорынан бір уыс саф алтын тиындар және әлем мемлекеттерінің ұлттық валюталары да орын алған.
Одан бөлек, кезіндегі КСРО, Чехославакия,Чехия, Нидерланды, Франция, Малайзия елдерінің айналымнан шығып қалған қағаз және металл монеталары таныстырылды.
Ұлттық музей ұйымдастырған шараға Астананың №56, №53 мектептерінің 7-8 сынып оқушылары қатысты.
