Елімізде трансплантацияны күту тізімінде қанша бала тұр
Сенатордың айтуынша, мұндағы кезек өте баяу әрі операцияны күтетін пациенттердің саны артып келеді.
Ақмарал Әлназарова Қазақстанда 2012 жылдан бастап органдарды ауыстыру бойынша 2 мыңға жуық операция жасалғаны туралы деректі келтірді. Бүгінгі таңда трансплантацияны күту тізімінде 3 300-ден астам адам бар, оның 105-і бала болып отыр. Сондай-ақ, соңғы 9 жылда елімізде балаларға 118 бүйрек трансплантациясы жасалды, оның 77%-ы донор туыстардан алынған.
Сенатор трансплантологиялық қызметті толыққанды қалыптастыру үшін жағдай жасау, сондай-ақ халықтың орган донорлығы туралы хабардарлығын арттыру бойынша жұмыс жүргізу қажеттігін атап өтті.
«Сонымен қатар, елімізде трансплантологияның дамуын тежейтін негізгі себептерге қолданыстағы нормативтік-құқықтық базаның жетілмегендігі, донорлық стационарлардың материалдық-техникалық базасының төмендігі, сондай-ақ медицина қызметкерлерінің құқықтық тұрғыда қорғалмағаны жатады», - деді Ақмарал Әлназарова Сенаттың жалпы отырысында.
Сенатор сонымен қатар донорлық органдар мен трансплантация бригадаларын өңірлерден орталыққа уақтылы және қауіпсіз жеткізудің техникалық қиындықтары бар екенін атап өтті.