Елімізде қанша мал басы тіркелмеген

НҰР-СҰЛТАН. ҚазАқпарат - «Ауыл шаруашылығы жануарларын бірдейлендіру» (АЖБ) ақпараттық жүйесінде «Жасыл дәліз – 3» функционалы іске қосылды. Ол 2022 жылдың 31 мамырына дейін жұмыс істейтін болады, деп хабарлайды ҚазАқпарат.

«Ветеринария қызметтеріндегі қызметкерлер оқытылды, жүйеде тіркеуге жататын ауыл шаруашылығы жануарларын сәйкестендіру үшін жергілікті атқару органдары басқармалары қосалқы және фермерлік шаруашылықтарды аралауды бастады. «Жасыл дәліздің» ашылуы ауыл шаруашылығы жануарларын сәйкестендіру қағидаларына сәйкес, 2000-2021 жылдар аралығындағы туған күні диапазонымен АЖБ ақпараттық жүйесінде тіркелмеген жануарларды сәйкестендіру және тіркеу жөніндегі жұмысты аяқтауға мүмкіндік береді. Жедел деректер бойынша бүгінгі таңда елімізде 432 мыңға жуық тіркелмеген мал басы бар», - делінген Ауыл шаруашылығы министрлігі мәліметінде.

Сонымен қатар, ҚР АШМ Ветеринарлық бақылау және қадағалау комитетіне жүйеге түзетулер енгізу алгоритмін әзірлеу, тіркелмеген мал басын АЖБ деректер базасында заңдастыру, АЖБ мобильді қосымшасын пайдалану бөлігінде (техникалық дайындығына қарай) ауыл шаруашылығы жануарларын сәйкестендіру ережелері мен деректер базасын қалыптастыру және жүргізу қағидаларына өзгерістер енгізу бойынша жұмыс істеу тапсырылды.

Естеріңізге сала кетейік, «Жасыл дәліз – 2» аясында жүргізілген жұмыстардың қорытындысы бойынша қосымша 71 343 ауыл шаруашылығы малы тіркелген.