Елімізде алтын өндірісі 0,7 пайызға артты

АСТАНА. ҚазАқпарат - 2019 жылдың қаңтар айында Қазақстанда өңделмеген және жартылай өңделген не болмаса ұнтақ түріндегі алтын өндірісінің көлемі 6 308 келіні құрады. Бұл 2018 жылдың қаңтарындағы мөлшерден 0,7 пайызға артық, деп хабарлайды ҚазАқпарат тілшісі.

ҚР Ұлттық экономика министрлігі Статистика комитетінің дерегіне сәйкес, есепті кезеңдегі өңделмеген және жартылай өңделген немесе ұнтақ түріндегі күміс өндірісінің көлемі 57 175 келі болды. Бұл да 2018 жылдың қаңтарындағы өндіріс көлемінен 4,1 пайызға артық.

Айта кетерлігі, қаңтарда кейбір бағалы металдар өндірісінің біршама төмендегені байқалады. Нақты айтқанда, өңделмеген алюминий, алюминий тотығы өндірісінің көлемі 2018 жылдың қаңтарымен салыстырғанда 13,2 пайызға төмендеп, 131 134 тонна болды. Ал өңделмеген тазартылған қорғаныс өндірісі 20,7 пайызға азайып, 10 470 тоннаны, өңделмеген мырыш өндірісі 3,5 пайызға кеміп, 27 492 тоннаны құрады. Өңделмеген тазартылған, қоспасыз мыс өндіру көлемі 2,8 пайызға өсіп, 36 787 тоннаға жетті.

Естеріңізге сала кетсек, бұған дейін ҚР ҰЭМ Статистика комитеті 2018 жылдың қаңтар-қараша айларында Қазақстанда өңделмеген және жартылай өңделген немесе ұнтақ түріндегі алтын өндірісінің көлемі 88 491 келіні құрағанын жариялаған еді. Бұл өткен жылдың сәйкес кезеңімен салыстырғанда, 14,1 пайызға көп.

Есепті кезеңде өңделмеген және жартылай өңделген немесе ұнтақ түріндегі күміс өндірісінің көлемі 879 737 келіге жетті. Бұл өткен жылмен салыстырғанда 8,3 пайызға артық көрсеткіш болатын.

Автор: Асхат Ахметбеков