Елімізде 36 мыңнан астам мәдениет және өнер қызметкерінің жалақысы өсті
«Мәдениет және спорт қызметкерлерінің әл-ауқатын арттыру - біздің жұмысымыздың маңызды аспектілерінің бірі. Мемлекет басшысының Жолдауын іске асыру шеңберінде 2020 жылдың 1 қаңтарынан бастап мәдениет және өнер ұйымдары қызметкерлерінің жалақысы республикалық деңгейде 50 пайызға дейін, өңірлерде 35 пайызға дейін өсті. Жалпы, шамамен 36,4 мың адамның, оның ішінде республикалық деңгейде 3 мыңға жуық, өңірлерде 31 мыңнан астам адамның жалақысы өсті», - деді Ақтоты Райымқұлова.
Министрдің айтуынша, 2020 жылдың 1 қаңтарынан бастап дене шынықтыру және спорт саласы қызметкерлерінің жалақысы жыл сайын 2023 жылға дейін 25 пайызға ұлғаяды (2020 жылы – 25 пайыз, 2021 жылы – 50 пайыз, 2022 жылы-75 пайыз, 2023 жылы-100 пайызға).
«Негізінен жаттықтырушы-оқытушылардың, мұғалімдердің, 4 мектеп-интернат-колледждері мен спорт колледжі тәрбиешілерінің, балалар-жасөспірімдер спорт мектебінің жаттықтырушы-оқытушыларының жалақысы көтеріледі. Бұдан басқа спортшылардың допингке қарсы зертханасының, Ұлттық допингке қарсы орталықтың қызметкерлеріне, дене шынықтыру және спорт жөніндегі Республикалық оқу-әдістемелік және талдау орталығының қызметкерлеріне, Спортты дамыту дирекциясының қызметкерлері мен жаттықтырушыларына лауазымдық жалақының 100 пайыз мөлшерінде жаңа қосымша ақылар белгіленді. Осылайша, олардың жалақысы 2 есе өсті», - деді ол.