Елімізде 3 мыңнан астам орынға қоқыс заңсыз тасталған

НҰР-СҰЛТАН. ҚазАқпарат – Жыл басынан бері ел аумағынан рұқсат етілмеген қоқыс тастайтын 3 411 орын анықталды. Оның 1 243-і жойылды, деп хабарлайды ҚазАқпарат тілшісі ҚР Экология, геология және табиғи ресурстар министрлігіне сілтеме жасап.

«Рұқсат етілмеген жерде қоқыстардың пайда болуымен күрес жалғасып жатыр. Жыл басынан бері «Қазақстан Ғарыш Сапары» ғарыштық мониторингі арқылы рұқсат етілмеген қоқыс тастайтын 3 411 орын анықтылды. Оның ішінде 1 243-і жойылды», - делінген министрлік ақпаратында.

Министрліктің хабарлауынша, заңсыз тасталатын қоқыспен күресте Қарағанды, Қызылорда облысы және Шымкент қаласы белсенді. Ал, ШҚО, Маңғыстау, Атырау және Жамбыл облысында төмен жұмыс нәтижесі байқалады.

«Жалпы, республика бойынша қоқысты рұқсат етілмеген жерде тастау деңгейі - 36%. Бұл бағыттағы жұмыс жандандырылады», - дейді ведомстводан.

Осы орайда, Экология министрлігі заңсыз қоқыс тастауға қатысты WasteEdit және wasteviewer мобильді қосымшасының жұмыс істейтінін жеткізеді.

Толық ақпаратты «Қазақстан Ғарыш Сапары» сервистерінен https://waste.gharysh.kz сілтемесі арқылы, геосервистен http://oko.gharysh.kz сілтемесі арқылы және «Oko KZ» мобильді қосымшасынан көруге болады.

Фото: ҚР Экология, геология және табиғи ресурстар министрлігі