Елге оралу қашанда қуаныш – Елена Рыбакина Алматыға келді

2022 жылғы 30 қараша, 18:07
Елге оралу қашанда қуаныш – Елена Рыбакина Алматыға келді

АСТАНА. ҚазАқпарат – Теннистен Қазақстан әйелдер құрамасының көшбасшысы Елена Рыбакина Алматы қаласына келді, деп хабарлайды ҚазАқпарат тілшісі.

Қазақстан теннис федерациясынан мәлім еткеніндей, спортшы журналистермен өткен баспасөз мәслихатында Уимблдондағы табысы, сондай-ақ жаңа маусымдағы ой-жоспарымен бөлісті.

«Ең алдымен мені жылы қабылдағаныңыз үшін алғысымды айтамын. Уимблдондағы жеңістен кейін Астанаға ұшып келіп, жанкүйерлеріммен кездестім. Астанадан кейін Алматыға келуім керек еді. Бірақ өзімді жайсыз сезінгендіктен, сапарымды кейінге қалдырдым. Міне, соның сәті енді туып отыр. Осында сіздермен әңгіме дүкен құрып, жас теннисшілермен шеберлік сағатын өткізуге мүмкіндік алғаныма қуаныштымын», деді Е.Рыбакина.

Елена Рыбакина желтоқсан айының ортасында Әбу-Дабиде өтетін көрме-жарысқа қатысатынын, сосын Дубайда жаңа маусымға дайындалатынын жеткізді. Қазақстанның бірінші ракеткасының жаңа жылдағы алғашқы жарысы Аустралияның ашық чемпионаты болмақ.

Баспасөз мәслихатынан кейін теннис орталығының тәрбиеленушілері атақты спортшымен кортқа шықты. Елена балалармен бірге жаттығып, шеберліктерін арттыру бағытында ақыл-кеңесін айтып, сұрақтарына жауап берді.

Еске сала кетейік, бұдан бұрын Михаил Кукушкиннің әлемдегі үздік 200 теннисшінің қатарына қайта кіргенін жазған болатынбыз.


Ұқсас жаңалықтар
Серіктестер жаңалықтары

Jańalyqtar