Елена Рыбакина Уимблдон турнирінің екінші айналымына шықты
2022 жылғы 29 маусым 01:25

Елена Рыбакина Уимблдон турнирінің екінші айналымына шықты

НҰР-СҰЛТАН. ҚазАқпарат – Қазақстанның бірінші, әлемнің 23-ракеткасы Елена Рыбакина Уимблдон турнирінің екінші айналымына шықты, деп хабарлайды ҚазАқпарат тілшісі.

Қазақстандық теннисші алғашқы айналымда дүниежүзілік рейтингте 157-орында тұрған америкалық Коко Вандевегемен кездесті.

Бірінші партия тағдыры тай-брейкте шешіліп, онда Е.Рыбакина айқын басымдылық танытты – 7:6 (7:2).

Екінші партияда есеп 5:5 болған мезетте Елена брейк жасай алды – 6:5. Содан кейін өз мүмкіндігін мүлт жіберген жоқ – 7:5.

Бір сағат 40 минутқа созылған матч барысында қазақстандық спортшы 11 эйспен бірге 1 брейк-пойнтты пайдалана білді. Қарсыласы 8 эйс жасағанымен, 9 брейк-пойнттың бірде-біреуін іске асыра алған жоқ.

Е.Рыбакина екінші айналымда әлемнің 56-ракеткасы, 2019 жылғы US Open жарысының жеңімпазы, канадалық Бьянка Андреескумен шеберлік байқасады. Ол 224-орындағы америкалық Эмина Бектасты оңай ұтты – 6:1, 6:3.

Тағы бір қазақстандық, әлемнің 33-ракеткасы Юлия Путинцева рейтингте өзінен төрт саты төмен тұрған франциялық Ализе Корнемен ойнап, 3:6, 6:7 (5:7) есебімен ұтылып қалды.

Ерлер арасында рейтингте 164-орындағы Михаил Кукушкин әлемнің 34-ракеткасы, америкалық Дженсон Бруксбиге шамасы жетпеді – 3:6, 2:6, 3:6.

Еске сала кетейік, бұдан бұрын Александр Бубликтің Уимблдон турнирін жеңіспен бастағанын жазған болатынбыз.


Ұқсас жаңалықтар

Jańalyqtar

Үрдіс

MURAǴAT