Электр энергиясы бойынша көрші елдерге тәуелді болмауымыз керек - Тоқаев
«Жалпы, Қазақстан электр энергиясымен қамтуда импортқа, көрші елдерге тәуелді болмауы тиіс. Қазір болып жатқан жағдайға барлық жағынан, ең алдымен мемлекеттің қауіпсіздігі тұрғысынан қайта қарау қажет», - деді Қасым-Жомарт Тоқаев Қазақстан халқына Жолдауында.
Сондай-ақ, Президент жаңартылатын энергетика жобаларын іске асыру жалғасатынын айтты.
«Гидроэлектростанциялардың дамуына ерекше назар аудару қажет. Энергиямен, жылумен және сумен жабдықтау - біртұтас технологиялық өзара байланысты жүйе. Оған экономиканың жеке маңызды саласы ретінде қарау керек. Қазіргі тәсіл ескірген. Енді жаңа шешімдер қажет», - дейді Мемлекет басшысы.
Бұған дейін Қасым-Жомарт Тоқаев тариф саясатын түбегейлі қайта қарауды ұсынған еді.
Одан бөлек, Президент алдағы бес жылда кемінде 14 гигаваттық жаңа электр қуаты іске қосылатынын айтты.