Елбасының зейнетақыны жаңғырту бойынша жүктеген тапсырмалары жұртшылықтың көңілінен шығады - Г. Исімбаева
«Елбасының зейнетақы жүйесін жаңғыртуды 2018 жылдан енгізу жөніндегі шешімі аса салиқалы, жан-жақты қамтылған дүние болды. Бұны бүкіл қазақстандықтар, оның ішінде әйелдер қауымы күткені де рас. Президенттің тапсырмасы бойынша зейнетақы жүйесін жаңғыртуды 5 жылға шегеру осы жұмыстарға әзірлік үшін толық мүмкіндікті қамтиды деп ойлаймын», - деді депутат Г. Исімбаева.
Оның айтуынша, Елбасының зейнетақыны жаңғыртуға қатысты жүктеген тапсырмалары да жұртшылықтың көңілінен шығады. Мәселен, бала күтіміне қатысты зейнетақы салымдарының мемлекет тарапынан субсидиялануы да, зейнетақы төлемдерін 5 пайызға арттыру шаралары да маңызды. Төлемдерді арттыру түптеп келгенде жинақтаушы қордағы қаражаттың көбеюіне ықпал етеді. «Ең бастысы 5 жылдық мерзімде жұмыспен қамту, өңірлерді дамыту бағдарламаларының барлығы үйлестіріліп, халықты, әйелдер қауымын жұмыспен қамтуды жан-жақты дамытуға тиіспіз. Әлбетте, басты мәселе - жұмыс. Жұмыс болса жалақы да болады, жалақыдан зейнет салымы алынады. Ал зейнет жинағы неғұрлым көбейген сайын, зейнетақы мөлшері де соғұрлым артатыны ақиқат», - деді Г. Исімбаева.