Елбасы Жер қойнауы туралы жаңа кодексті жыл соңына дейін қабылдауды тапсырды

АСТАНА. ҚазАқпарат - Ел халқына арнаған «Қазақстанның үшінші жаңғыруы: жаһандық бәсекеге қабілеттілік» тақырыбындағы жолдауында Президент Нұрсұлтан Назарбаев 2017 жылдың соңына дейін Жер қойнауы туралы жаңа кодексті қабылдауды тапсырды.

 «Экономикалық өсімнің тұрақтылығы үшін елдің тау-кен металлургиясы мен мұнай-газ кешендері өзінің стратегиялық маңызын сақтауға тиіс.

Әлемдік сұраныс бәсеңдеп кеткен кезде жаңа нарықтарға шығып, өнім жеткізу аумағын кеңейту керек. Минералдық-шикізаттық базаны кеңейтуге баса назар аударылуға тиіс. Геологиялық барлау жұмыстарын белсенді жүргізу керек», деп атап өтті Мемлекет басшысы.

Нұрсұлтан Назарбаев бұл салаларды одан әрі дамыту ісі шикізатты кешенді түрде қайта өңдеуді тереңдете түсумен берік ұштастырылуы тиістігіне тоқталды.

«Жыл соңына дейін Жер қойнауы туралы жаңа кодексті қабылдап, салық заңнамаларына қажетті өзгерістер енгізуді тапсырамын», - деді Елбасы.