Елбасы: Қазақтың 100 жаңа есімін анықтап, оларды дүниежүзіне насихаттау керек
2017 жылғы 21 тамыз 23:30

Елбасы: Қазақтың 100 жаңа есімін анықтап, оларды дүниежүзіне насихаттау керек

АСТАНА. ҚазАқпарат - Елбасы Нұрсұлтан Назарбаев Хабар телеарнасына берген сұхбатында өзінің бағдарламалық мақаласында айтылған «Қазақстандағы 100 жаңа есім» жобасы туралы пікір білдірді, деп хабарлайды ҚазАқпарат тілшісі.

Мемлекет басшысы Тәуелсіздіктің 26 жылында елге танылған, дүниежүзіне мақтанышпен көрсететін үздік тұлғаларды іріктеп алу қажеттігін және оларға жан-жақты қолдау көрсетілуі керектігін атап өтті.

«Тәуелсіздіктің 26 жылдығына келе жатырмыз, осы 26 жыл ішінде елге танылған, мақтауға түрарлық, сыртқа шығарып көрсететіндей, ең үздік 100 есімді анықтау керек. Есімді шығаратын - адамның өз таланты, әрине. Екіншіден, сол талантты әлемге танытып, паш ететін жағдай болуы керек. Сондықтан, ондай тұлғаларымыз 100 болса да, 25 болса да, дүниежүзіне насихаттауымыз керек. Олардың шығармаларын шет тілдеріне аударып, ақпарат құрлардарынан көрсетіп, «Қазақта осындай тұлғалар бар, осындай шығармалар бар» деп мақтануға болады», - деді Нұрсұлтан Назарбаев.

Сонымен бірге, Елбасы рухани жаңғыру жұмыстарына ел болып, жұмыла кірісу қажеттігін баса айтты.

«Талай зиялылармен кездесіп жүргенде, олар көптен күткен мәселе еді деп айтты. Ал енді көптен күттік деп тағы да Астанаға қарап не айтар екен деп отырмай, әрқайсымыз осының төңірегінде жұмыс істеп, насихаттауымыз керек. Мен нақты қолға алып отырмын. Бұл негізінен жергілікті биліктің, әкімдердің қолында деп санаймын. Сол жерден басталуы керек те, әріге дейін жеткізуіміз керек. Бір сөзбен айтқанда, Қазақстан - біздің Отанымыз. Біздің басқа Отанымыз жоқ. Қазақтың Отаны - жалғыз Қазақстан. Мұның барлығы сол Отанды сүю, сол Отанды мадақтау, осы Отанды дүниежүзіне белгілі ету үшін жасалып отыр», - деді Президент.

Jańalyqtar

MURAǴAT