Эльмира Ершұманова: Ауыл әкімдерін сайлау – ауыл тұрғындарына зор мүмкіншілік беріп отыр
Ауыл әкімдерін сайлауда енгізіліп отырған жаңа формат ауыл тұрғындарына өз туған жерін көркейтуге және дамытуға зор мүмкіндік сыйлайды, деп есептейді «Ұлытаудың іскер әйелдері» қоғамдық бірлестігінің төрайымы Эльмира Ершұманова.
«Ауыл әкімдерінің жаңа форматтағы сайлауы жергілікті басқару мен реформалау стратегиялық міндеттерін шешуге бағытталған. «Халық үніне құлақ асатын мемлекет» тұжырымдамасы айқын көрініс табуда, яғни халыққа ауылды көркейтуге және дамытуға атсалысатын, ел мүддесін қорғайтын ауыл басшысын таңдауға мумкіндік берілуде. Сонымен қатар аталмыш сайлау партиялардың өкілеттігін кеңейту арқылы саяси бәсекелестікті дамытуға септігін тигізбек», - дейді Эльмира Ершұманова.
Спикердің айтуынша, халықтың мемлекетке сенімділігі артып, жариялылық қағидаты та көрініс табады.
«Халыққа осы секілді сайлау форматы өте тиімді, себебі халық жергілікті жердің жыртығын жамап, барын асыратын басшыны өзі сайлайды. Ауыл тұрғындарына мүмкіншілік берілуде, өз еліне адал, мемлекеттің бағдарламасын іс жүзіне асыруға жане орындауға дайын ел азаматын алға тарта алады», - деді ол.
Естеріңізге сала кетейік, Қазақстан Президенті 2020 жылғы 1 қыркүйектегі халыққа Жолдауында ауыл әкімдерін тікелей сайлауды енгізу қажеттігі туралы айтқан болатын. Қасым-Жомарт Тоқаев 2021 жылғы 25 мамырда «Қазақстандағы сайлау туралы» Конституциялық заңға түзетулерге қол қойды.
Қарағанды облысында бүгін, 25 шілдеде таңғы жетіде сайлау учаскелері ашылды. Ауыл әкімдерінің алғашқы тікелей сайлауы 149 елді мекенде өтуде. 81 мыңнан астам сайлаушы өздерінің конституциялық құқығын жүзеге асыра алады.