АСТАНА. ҚазАқпарат - Эквадордың оңтүстігінде сенбі күні болған 6,9 балдық жер сілкінісінен кем дегенде 126 адам зардап шекті, деп хабарлайды ҚазАқпарат ТАСС-қа сілтеме жасап.
Эквадордың Төтенше жағдайларды басқару ұлттық қызметінің мәліметі бойынша, қаза тапқандар саны 13-ке жетті. 50-ге жуық тұрғын үй бүлінген, жетеуі толығымен қираған.
Сонымен қатар 17 білім беру мекемесі мен 31 медициналық орталық ғимараты зақымданған. Зілзала ошағы 32 мың адам тұратын Наранхал қаласынан оңтүстік-батысқа қарай 17 шақырым жерде орналасқан. Тереңдігі - 85 км. Жерасты дүмпулері елдің 24 провинциясының 13-інде сезілді.
Бұған дейін Эквадорда 6,7 балдық жер сілкінісі болғанын хабарлаған болатынбыз.