Экс-шенеунік Бақытгүл Хаменова Жоғарғы сотқа шағым түсіретінін айтты
Кеше, 20 ақпанда Атырауда Б.Хаменованың ісіне қатысты апелляциялық шағым қарала бастағанын жазған едік.
Аппеляциялық шағым облыстық соттың қылмыстық істер жөніндегі сот алқасында қаралды. Бүгін, 21 ақпанда сот алқасы 7 жылға сотталған экс-шенеунікке үкімді өзгеріссіз қалдырды.
Енді Б.Хаменова Жоғарғы сотқа шағым түсіретінін айтып отыр.
«Ендігі үміт – Жоғарғы сотта. Менің еш кінәм жоқ. Сондықтан кассациялық сатыдағы Жоғарғы сот істің егжей-тегжейін қарап, үкім шығарады деп ойлаймын. Өзімнің ақтығымды дәлелдеу үшін соңына дейін күресемін. Жоғарғы сотқа жүгініп, әділдікке жетеміз», - деп мәлім етті ол тілшілерге.
Еске салайық, Атырау облысы әкімінің бұрынғы орынбасары Бақытгүл Хаменованың ісіне қатысты сот отырысы былтырғы 11 тамызда басталған еді. Айыптау актісі 55 беттен тұрды.
Былтырғы 15 қарашада үкім шығып, ол 7 жылға сотталды. Сот облыс әкімінің бұрынғы орынбасарын ҚР Қылмыстық кодексінің 366-бабы 3-бөлігінің 2-тармағымен (Ірі көлемде пара алу) кінәлі деп таныды.
Оның жас балаларының бары ескеріліп, Қылмыстық кодекстің 74-бабы 1-бөлігіне сәйкес жазаны өтеу мерзімі 3 жылға кейінге қалдырылды.
Кейін Хаменова сот үкіміне аппеляциялық шағым түсірді.