Екібастұздағы апат: 50-ге жуық пәтер бүлінген

None
ЕКІБАСТҰЗ. ҚазАқпарат - Екібастұзда апат салдарынан барлығы зақымдалған 50 шақты пәтер анықталды. Бұл үйлерде дүйсенбіден бастап ретке келтіру үшін бригадалар жұмысқа кіріседі, деп хабарлайды Pavlodarnews.kz.
«Әкімдік қызметкерлерімен бірге пәтерлерді аралап шықтық. Апат салдарынан барлығы зақымдалған елу шақты пәтер анықталды. Бұл үйлерге дүйсенбіден бастап бригадалар кіріп, адам тұратындай жағдайға келтіреді. Қалған өтініштер топтастырылғаннан кейін жұмыс басталады. Егер де комиссия тұрмыстық техника апат салдарынан істен шыққанын растаса, шығынның өтелетіндігіне үміт артуға болады», — деді «ОАЭК» АҚ басқарма төрағасының орынбасары Леонид Янушко баспасөз конференциясында.

Екібастұз қаласының әкімі Аян Бейсекиннің айтуынша, барлық зардап шеккен пәтерлер бойынша жеке тізім жасалуда. Ол үшін арнайы өтініштерді қабылдайтын жеті мекенжай бойынша пункті ашылған. Бұдан бөлек, әкімшілікте зардап шеккен азаматтардың шағымдарын қабылдайтын пункті бар.

«Бұл мәселеге қатысты «ОАЭК» АҚ басшылығымен келіссөздер жүргізілген. Сондықтан да жалған ақпарат болмауы тиіс. Міндетті түрде жөндеу жұмыстары жүргізіледі. Ақауларды анықтайтын 70 адамнан тұратын жеті бригада құрылған. Тұрғындардың өздері жөндеуді бастаған жағдайлар да бар. Ол үшін чектерді ұсыну қажет. Мұндай жағдайда комисия тексергеннен кейін шығын өтеледі», — деді Аян Бейсекин.

Еске салайық, 27 қарашада Екібастұз жылу электр орталығында апат болып, қала тұрғындары жылусыз қалды.

Кейін жылу қазандығының істен шығуына байланысты облыс әкімі бастаған жедел штаб құрылды.

Екібастұз қаласының оқушылары онлайн оқуға көшірілді.

28 қараша күні таңертең қалада жергілікті ауқымдағы төтенше жағдай жарияланды.

30 қарашада Екібастұзға Премьер-Министр Әлихан Смайылов барып, кінәлілер жауапқа тартылатынын айтты.

Апат себебі ретінде жылу желілерінің тозуы, жылу орталығы басшылығының немқұрайлылығы мен инвестициялардың жеткіліксіздігі аталды.

Мемлекет басшысының тапсырмасы бойынша Премьер-Министрдің бірінші орынбасары Роман Скляр қалалық жылу желілеріндегі апаттың салдарын жою жөніндегі жұмыстар аяқталғанша Екібастұзда болатыны хабарланды.

4 желтоқсанда Роман Скляр телефон арқылы Үкімет басшысы Әлихан Смайыловқа қалалық жылу желілеріндегі апаттың зардаптарын жою барысы туралы баяндады. 8 желтоқсанда Екібастұзда төтенше жағдай режимі алынды.


Соңғы жаңалықтар