Екібастұзда су құбырындағы апат салдарын жоюға ТЖД қызметкерлері жұмылдырылды

ЕКІБАСТҰЗ. ҚазАқпарат – Павлодар облысы ТЖД қызметкерлері Екібастұздағы апат салдарын жоюға жұмылдырылды, деп хабарлайды ҚазАқпарат Төтенше жағдайлар министрлігіне сілтеме жасап.

«2023 жылғы 3 қаңтарда сағат 6:00-ден бастап Екібастұз гарнизонының құтқарушылары күшімен зақымдалған учаскеден суды сорып шығару жұмыстары жүргізіліп жатыр. Сағат 11:00-де «Қалалық су арнасы» МКК және «Инженерлік желілер» ЖШС қызметкерлері зақымдалған учаскені ауыстыру және диаметрі 500 мм техникалық су құбырын ажырату бойынша жөндеу жұмыстарын бастады. Қалада жылу және сумен жабдықтау штаттық режимде жүріп жатыр (5 қазандық агрегаты жұмыс істеп тұр және 5-еуі резервте). Авария орнына ТЖД, «Қалалық су арнасы» МКК 58 адам және 16 техникасы мен құралдары жұмылдырылды. Сағат 16:00-дегі жағдай бойынша жылу желісін қоректендіру резервуарларындағы су деңгейі – 7,5 метр, сыни көрсеткіш – 1,6 метр. ЖЭО резервуарларын қуаттандыру – сағатына 900 тонна (жылу желілерін қуаттандыру – сағатына 600 тонна). Қазіргі уақытта қоректендіру диаметрі 150 мм (сағатына 150 тонна) ауыз су құбырынан жүргізіліп тұр», - делінген ведомство ақпаратында.

Павлодар облысы ТЖД баспасөз қызметінен мәлім еткендей, вахталық және командалық-штабтық машина (КУНГ) базасында жылыту пункті ашылды, сондай-ақ «Vita» волонтерлері ыстық тамақпен қамтуды ұйымдастырды.

Еске сала кетейік, 31 желтоқсан күні Екібастұз қаласында «Қалалық су арнасы» кәсіпорнындағы жөндеу жұмыстары кезінде ЖЭО-ға арналған диаметрі 500 мм болатын техникалық құбыр жарылды.