Екібастұзда 149 көпқабатты тұрғын үй жылудан уақытша ажыратылды

2022 жылғы 30 қараша, 20:05
Екібастұзда 149 көпқабатты тұрғын үй жылудан уақытша ажыратылды

ПАВЛОДАР. ҚазАқпарат – Бүгін сағат 18:00-де Екібастұзда № 52 орталық жылу пунктінің жылу желілеріндегі зақымдануды жою және жапқышты ауыстыру үшін жылу желілерінің магистралі ажыратылды, деп хабарлайды ҚазАқпарат тілшісі.

«Екібастұз қаласындағы апаттық жағдайды жою бойынша жедел штабтың мәліметінше, 30 қарашада сағат 18:00-дегі жағдай бойынша жылу тасымалдағышты жіберу температурасы 93º С (қалыпты жағдайда – 84º С), кері қайтару – 60º С (қалыпты жағдайда -56º С); сыртқы ауа температурасы-19 º С. Орталық жылу пунктіне қосылған 17 көппәтерлі тұрғын үй, 2 әлеуметтік нысан және 1 әкімшілік ғимарат (ОЖП-52), сондай-ақ 32 көппәтерлі тұрғын үй мен 72 жеке тұрғын үй жылудан ажыратылған», - деп хабарлады журналистерге Павлодар облысы әкімінің баспасөз қызметі.

Екібастұз ЖЭО-да алты қазандық агрегаты (№ 6,8,9,12,14,15) жұмыс істеп тұр, тағы төрт қазандық агрегаты (№ 5,7,11,13) резервте. Желілік сумен жабдықтау сағатына 1200 тоннадан 750 тоннаға дейін төмендеді (қалыпты жағдайда – сағатына 400 тонна).

«30 қарашада сағат 18:00-де ОЖП-52 жылу желілеріндегі зақымдануды жою және жапқыштыауыстыру үшін жылу желілерінің магистралі ажыратылды. 149 көпқабатты үй мен 114 жеке үй жылумен жабдықтаудан ажыратылды», - деп толықтырды әкімдік.

Апаттық-қалпына келтіру жұмыстарына 256 адам және 43 техника жұмылдырылды. Жөндеу бригадалары тәулік бойы жұмыс ұйымдастырылды.

27 қарашадан бастап Екібастұздың білім беру нысандары қашықтан оқыту форматына ауыстырылды, балабақшалардың жұмысы тоқтатылды.

Облыстық әкімдіктің мәліметінше, адамдарға шұғыл көмек уақтылы көрсетіліп жатыр.

«Емдеу мекемелеріндегі температуралық режим санитарлық нормаларға сәйкес 18-24ºС шегінде сақталады. Екібастұз қалалық ауруханасында 255 пациент (оның 75-і – бала), оның ішінде перзентханада – 65 пациент (оның ішінде 28 бала) жатыр. Қала тұрғындары үшін 14 жылыту пункті ашылды», - деп нақтылады баспасөз қызметі.


Ұқсас жаңалықтар
Серіктестер жаңалықтары

Jańalyqtar