Егін жинау науқанының қарқыны былтырғыдан жоғары – Ербол Қарашөкеев

НҰР-СҰЛТАН. ҚазАқпарат – Дәнді және дәнді-бұршақты дақылдардың 95 пайызы жиналды. Бұл туралы бүгін Үкімет отырысында ҚР Ауыл шаруашылығы министрі Ербол Қарашөкеев айтты, деп хабарлайды ҚазАқпарат тілшісі.

«Осы жылы егін жинау жұмыстары уақтылы басталды. Бұл ретте егін жинау науқанының қарқыны былтырғыдан жоғары. Мәселен, бүгінгі күні республика бойынша барлығы 15,1 млн гектар дәнді және дәнді-бұршақты дақылдар немесе олардың жалпы алаңының 95 пайызы жиналды. Ал өткен жылы осындай уақытта 14,5 млн гектар немесе 91,5 пайыз жиналған болатын», - деді министр.

Оның атап өтуінше, бүгінгі күні орташа түсімділік гектарына 9,4 центнерді құрады.

«Бұдан басқа, майлы дақылдар, көкөністер, картоп, бақша дақылдары мен мақта жинау жұмыстары жүргізіліп жатқандығын атап өткен жөн», - деді ол.