Дзюдо: Еуропа кубогында қазақстандық балуандар күміс пен қола алды

АСТАНА. ҚазАқпарат - Италия астанасы Рим қаласында өтіп жатқан дзюдодан ерлер арасындағы Еуропа кубогында Қазақстан қоржынына бір күміс және қола медаль түсті, деп хабарлайды ҚазАқпарат тілшісі Қазақстан дзюдо федерациясының Facebook әлеуметтік желісіндегі парақшасына сілтеме жасап.

Еуропа кубогында 60 келіде финалға шыққан Дәурен Сүйкенов күміс медальды қанағат тұтты. Ол ақтық сында әзербайжандық Оруж Вализадаға есе жіберіп қойды.

Бауыржан Жауынтаев бүгінгі жұбаныш финалында моңғолиялық Энхтайван Арюнболдты қосымша уақытта иппонмен жеңді. Бұл жеңіс Бауыржанға қола жүлде сыйлады.

Ал тағы бір балуанымыз 66 келіде Ерлан Жақсыбеков 5-орынмен аяқтады. Ол жұбаныш финалында испаниялық Даниел Роман Перезге есе жіберді.

Айта кетерлігі, аталмыш жарысқа біздің еліміздің құрамасы сапында 22 балуан қатысты.