16:18, 04 Қыркүйек 2018 | GMT +6
ДСМ Ұлттық сараптама орталығы директорының үстінен іс қозғалды
АСТАНА. ҚазАқпарат - ҚР ДСМ Ұлттық сараптама орталығының директоры ұсталды. Бұл туралы бүгін Мемлекеттік қызмет істері және сыбайлас жемқорлыққа қарсы іс-қимыл агенттігінің ресми өкілі Нұрлан Жахин мәлім етті, деп хабарлайды ҚазАқпарат тілшісі.
Оның айтуынша, ҚР ДСМ Ұлттық сараптама орталығының директоры Павлодар облысында «Дихлорметан» химиялық дәрі-дәрмегін сатып алуға бағаны жөнсіз көтеру арқылы 15 млн теңгеден астам ақша қаражатын жымқырды деген күдікке іліккен.
Аталған дәрі-дәрмекті сатып алу бойынша конкурстық комиссиясының төрағасы бола тұрып және мердігер ұйыммен сөз байласып, соңғыға мемлекеттік сатып алу конкурсы бойынша жеңісті қамтамасыз еткен. Одан кейін көрінеу көтерілген баға бойынша дәрі-дәрмектің жеткізіліміне келісімшартқа отырған. Содан кейін атқарылған жұмыс актісіне қол қойып, оларға толық көлемде ақша қаражатын төлеуді қамтамасыз еткен. Тергеу жүргізілуде», - деді ресми өкіл.