Допты хоккейден әлем чемпионаты: Қазақстан Норвегиядан жеңіліп қалды

АСТАНА. ҚазАқпарат - Допты хоккейден Қазақстан құрамасы Швецияның Оби қаласында өтіп жатқан әлем чемпионатында үшінші ойынын Норвегияға қарсы өткізді, деп хабарлайды ҚазАқпарат тілшісі.

А дивизиондағы іріктеу сатысының үшінші ойынында қазақстандық хоккейшілер Норвегияға 1:6 есебімен есе жіберді.

Ел құрамасынан жалғыз голды Денис Максименко өзінің еншісіне жазды.

Қазірге дейін қазақстандық хоккейшілер Финляндияға 1:8 есебімен жол берсе, АҚШ құрамасын 7:2 есебімен тізе бүктірді.

Енді іріктеу сатысында 1 сәуірде Швециямен шеберлік байқасады.

Ойын кестесінде алғашқы екі орын алған құрамалар бас жүлдені сарапқа салса, үшінші-төртінші орындағы құрамалар қола жүлдеге таласады.

Әлем чемпионатында ел құрамасы 2003, 2005, 2012, 2013, 2014, 2015 жылдарда үшінші орын алды.