ДОПТЫ ХОККЕЙ: «Ақжайық» тартысты матчта «Динамо-Маяк» командасына есе жіберді

ОРАЛ. ҚазАқпарат - Допты хоккейден Ресей чемпионаты жоғары лигасының екінші тобында ойнайтын Оралдың «Ақжайығы» 2 желтоқсан күні Краснотурьинскіде жергілікті «Динамо-Маяк» командасымен айдынға шықты.

Ресей допты хоккей федерациясының сайтынан алынған мәліметке қарағанда, кездесу аса тартысты өтті. Алдымен қонақтардан Петр Грибанов есеп ашқанмен, бұдан кейін айдын иелері үш гол соғып, алға шықты. Дегенмен Максим Өтебалиев пен Сергей Башаевтың көмегімен «Ақжайық» есепті теңестіре алды. Әйтсе де ойын соңында төрешілер оралдықтар қақпасына 12 метрлік айып добын белгілеп, оны Павел Легаев дәл орындады. Сөйтіп «Динамо-Маяк» 4:3 есебімен жеңіске жетті.

Ертең командалар екінші кездесуін өткізеді.