Допинг қолданғаны үшін Айбол Әбікен төрт жылға футболдан шеттетілді

НҰР-СҰЛТАН. ҚазАқпарат - Қазақстан ұлттық құрамасының жартылай қорғаушысы, 26 жастағы Айбол Әбікен допинг қолданғаны үшін төрт жылға футболдан шеттетілді, деп хабарлайды ҚазАқпарат тілшісі.

Қазақстан допингке қарсы орталығынан мәлім еткеніндей, мамыр айында Айбол Әбікеннің ағзасынан тыйым салынған мельдоний (милдронат) препараты табылған болатын.

Осылайша, А.Әбікен кәсіби футболға 2026 жылдың 29 сәуірінде ғана, отыз жасқа жақындағанда орала алады.

Биылғы маусымда жалгерлік құқығымен павлодарлық «Ақсу» құрамында 7 матч өткізіп, 3 гол соқты, 1 нәтижелі пас берді. Айбол - алматылық «Қайраттың» түлегі, оның ойыншы ретіндегі құқығы осы командаға тиесілі.

Футболшы Қазақстан құрамасы сапында 14 матчта Албания қақпасына 1 гол соқты.

Осымен үш жылға жетпейтін мерзім ішінде допинг табылған Қазақстан құрамасының үш ойыншысы футболдан шеттетілді. 2020 жылдың күзінде БАӘ-нің «Аль-Айн» командасында доп тепкен Бауыржан Исламхан, ал өткен жылы күзде «Тобылдың» жартылай қорғаушысы Руслан Валиуллин екі жыл мерзімге футбол ойнау құқығынан айырылды.

Еске сала кетейік, бұдан бұрын «Қызылжар» - «Ақжайық» матчының Петропавлдан елордаға ауыстырылғанын жазған болатынбыз.

Бұл матч бүгін «Астана Арена» стадионында елорда уақытымен сағат 15.00-де басталады.