Діни басқарма Маңғыстау облысында спорт кешенін салып, ел игілігіне тапсырды

АҚТАУ. ҚазАқпарат - Бүгін Қазақстан мұсылмандары діни басқармасы Маңғыстау облысы Маңғыстау ауылында салынған спорт кешенін өңір тұрғындарының игілігіне берді, деп хабарлайды ҚазАқпарат басқарманың ресми сайтына сілтеме жасап.

Спорт кешенінің ашылу салтанатына Бас мүфти Наурызбай қажы Тағанұлы, Маңғыстау облысының әкімі Серікбай Өтелгенұлы Трұмов қатысты.

Игі іс-шарада сөз алған Бас мүфти: «Өздеріңіз жақсы білесіздер, біз өткен жылы 30 жылдық мерейтойымыздың аясында шалғай ауылдарға құдық, көпір, емхана, жол салуға үлес қостық. Осынау ізгі ісіміздің жалғасы ретінде бүгін спорт кешенін халық игілігіне беріп отырмыз. Мешіт, медіресе салудың сауабы қандай үлкен болса, ел игілігі үшін берілген көпір, жол, емхана құдық, спорт кешені сынды ғимараттарды тұрғызу сондай қайырлы істің бірі. Осы іске үлес қосқан барша азаматтарға Алла разы болсын деймін. Біз мемлекеттің бұқаралық спортты дамытуға арналған бастамаларына үлес қосуды жалғастыра береміз. Өйткені жастардың жаны мен тән саулығы - маңызды мәселе. Оған үлес қосу – баршаға ортақ іс. Ғалымдарымыз: «Атқа міну, садақ ату, күрес пен жүгіру – созылмалы аурулардың бірден-бір дауасы» деген. Дене шынықтыру адам баласының тәнін ғана дамытып қоймай, рухани жақтан да тәрбиелейді. Өз нәпсісін жеңуге, өз денесін өзіне бағындыруға жәрдемдеседі. Өйткені, ол – қуат. Дене қуаты, ой ұшқырлығы, иман қуаты – ер жігіттің көркемдігі», - деп атап өтті.

Сондай-ақ Маңғыстау облысының әкімі Серікбай Трұмов спорт кешенінің ашылу рәсімінде имамдардың қайырымдылық жұмыстарға белсенді түрде атсалысатындығын айтты. «Барша дін қызметкерлеріне шынайы алғысымды білдіремін. Осы кешеннен мықты спортшылар шығуына тілектеспін», - деді ол.

Айта кетсек, спорт кешенінің жалпы аумағы – 1300 шаршы метр. Ғимарат халықаралық талаптарға сәйкес салынған.