Димаш Құдайбергеннің ерекше портреті жасалды
Фабрика мамандары портретті екі күннің ішінде жасап шығарған. Портрет тігінен жасалған, оның биіктігі 180 см және ені 82 см. Оны жасау үшін бірнеше маман жұмыс істеген. Олардың бірі - Анар Әбдіғасенова. Бойжеткеннің мамандығы Қазақстан еңбек нарығында сирек кездеседі - ол дессинатор маманы, яғни төрт мамандықтың жиынтығынан құралған шебер.
Ол - әрі текстиль дизайнері, мата суретшісі, тоқыма құрылғыларының программисті және инженер. Бұдан бөлек, бойжеткен Димаш Құдайберген білім алатын университетте оқиды.
«Мен Қазақ ұлттық өнер университетінің студентімін. «Киім дизайнері» мамандығы бойынша білім алып жатырмын. Фабрикаға Түркия, Италия елдерінен мамандар келіп, түрлі шеберлік сыныптарын өткізді. Осылайша, жұмыс істеуді үйреніп кеттім», - деді ол.
Тоқыма цехының технологы Майя Вершинина атап өткендей, осындай өзгеше туындыны жасап шығаруға кәсіпорындағы технологиялық жаңғырту мүмкіндік берген.
