Димаш Құдайберген жайлы деректі фильм түсіріліп жатыр

НҰР-СҰЛТАН. ҚазАқпарат - «Қазақстан» ұлттық арнасы әнші Димаш Құдайберген туралы деректі фильм түсіріп жатыр. Бұл туралы телеарнаның басқарма төрағасы Ерлан Қарин Орталық коммуникациялар қызметінде өткен баспасөз мәслихатында айтты, деп хабарлайды ҚазАқпарат тілшісі.

«Димаштың Нұр-Сұлтанда өтетін концертінен басқа тағы бір жобамыз - әнші туралы деректі фильм. Ол жөнінде біз бір уақытта келістік. Өткен жылы Димаштың концертін ұйымдастыру жөнінде ақылдасып жатқан уақытта, деректі фильм түсірсек деген ұсыныс айтқан едік. Оның шығармашылығына қызығушылық өте үлкен», - деді «Қазақстан» РТРК» АҚ басшысы Ерлан Қарин.

Оның айтуынша, әншінің келісімін алғаннан кейін шағын шығармашылық топ жұмысқа кірісіп кеткен.

«Бұл фильмде бұрын жарияланбаған түрлі бейнематериалдар көрсетілетін болады. Оған дайындық барысында біздің команда әншінің Мәскеудегі концертіне барды. Әріптестерімен арнайы сұхбаттар түсірді. Мәскеудегі концертінен кейін Қытайға сапарға аттанып, Хунан арнасындағы үлкен шоуға қатысты. Біз шоудың түсіріліміне де қатысып, ол жақта да Қытайдағы достары мен әріптестері тарапынан сұхбаттарды түсірдік. Әрине, негізгі түсірілім Нұр-Сұлтанда 29 маусымда өтетін концертіне байланысты болды. Оқиға желісі осының негізінде құрылады. Бұл - Димаштың ең үлкен концерті. Әлбетте, Димаштың әлемнің әр түкпірінде концерті өтіп жатыр. Бірақ, бұл ең ауқымды концерті болады деп ойлап отырмыз», - дейді Ерлан Қарин.

«Қазақстан» телеарнасының басқарма төрағасы деректі фильм күзде көрсетілетінін хабарлады.

Еске сала кетсек, аталмыш баспасөз мәслихатында Ерлан Қарин Димаш Құдайбергеннің елордада өтетін жеке концертіне билеттердің 70 пайызы сатылып кеткенін хабарлаған болатын.

Фото: vk.com/dimashdearseurasianfanclub