10:53, 21 Қазан 2020 | GMT +6
Депутаттар Глеб Щегельскийді бір минут үнсіздікпен еске алды
НҰР-СҰЛТАН. ҚазАқпарат – Бүгін Мәжіліс депутаттары жалпы отырыста қайтыс болған Глеб Щегельскийді бір минут үнсіздікпен еске алды, деп хабарлайды ҚазАқпарат.
17 қазан күні Мәжілістің V және VI шақырылым депутаты Глеб Щегельский жүрек талмасынан мезгілсіз қайтыс болды.
«Глеб Анатольевич Мәжілістің Экология және табиғат пайдалану мәселелері жөніндегі комитетін басқара отырып, өзінің күш-жігерін, білімі мен тәжірибесін еліміз бен халқымызды игілігіне бағыттаған еді. Ол осы жылдары Үкіметпен де белсенді жұмыс істеді. Осы орайда жаңа Экологиялық кодекстің жобасы бойынша елеулі қызмет етті», - деді Мәжіліс төрағасы Нұрлан Нығматулин.
Жалпы отырыстың басында депутаттар Глеб Щегельскийді бір минут үнсіздікпен еске алды.
Бұдан бұрын хабарланғандай, қайғылы жағдайға байланысты Мәжіліс спикері Нұрлан Нығматуллин марқұмның отбасына, туыс-туғандары мен жақындарына көңіл айтқан болатын.